今個禮拜日就係大家樂上市20周年大喜日子，一手都係現金嘅大家樂，派特別股息固之然係必備嘅慶祝項目，原來佢哋仲準備喺9月19號，喺尖沙嘴洲際酒店整番餐20周年晚宴。
主席陳裕光話，考慮邀請當年幫大家樂上市嘅投資銀行（渣打同埋東亞華寶）主事者DavidStileman同埋李禮文，以及相關律師同會計師出席。佢記得大家樂86年同國泰、玉朗同一個月上市，招股價1.18元，𠵱家股價已接近當年10倍，所以想一齊開心吓喎，唔知鍾意跳拉丁舞嘅陳主席，到時會唔會同太座表演一part舞娛賓呢吓？
正所謂：「錢係夥計幫你搵番嚟嘅。」陳裕光話，9月16號除咗會邀請公司嘅長期服務員工（15至20年者，計落都有五、六百人）擦番餐外，今日會發信畀各同事，出多半個月特別花紅，連同中期嗰半個月，今年就有成個月特別花紅。
多半個月特別花紅
除咗繼續向每個做夠15年嘅員工派1萬銀（不過只限用嚟買錶）外，大家樂仲考慮向呢批長期服務員工派送如金牌或股票之類，之不過，佢「金牌」兩個字一出口，即刻遭到現場聽記者會嘅員工代表抗議，事關金牌實在唔等使，雖然金價仲係睇升，但攞住呢個老人牌，賣好唔賣好呢？既然佢講到大家樂股票「咁有升值潛力」，咁就梗係要股票好過啦！
李華華
讀者如有任何意見或報料，歡迎發送電郵至[email protected]。