幪面超人1、2號35年後回歸，未知電影版《幪面超人TheFirst》橋段，單睇充滿時代氣息嘅型爆Look，已叫新舊戲迷畀錢觀看，經歷35年，「蝗蟲」精神不死。港版3區DVD終於有聲氣推出，先喺7月書展首賣，限定版內容簡直叫Fans不得不屈服；首先係Cool到痹嘅盒面，代理強調其3D設計為賣點，未見過實物唔知點3D法，估計係盒面嘅幪面超人微微凸起。DVD版當然唔少得BonusDisc，入面主要收錄《幪面超人TheFirst》首映花絮、監製專訪、拍攝特輯等例牌嘢，單單Bonus已達120分鐘，相信Fans已感滿足。
香港代理嘅亞洲影帶就特別為限定版加入唔少精美禮品，包括電影特刊、大大張海報、1套7款明信片等，成套港版3區BoxSet都只係賣$150，書展期間肯定爭崩頭，希望過後在DVD舖仍可買到呢套限定版喇。
記者：徐影龍
亞洲影帶書展攤位：2號館，35、37號舖