正所謂老襯當旺！有人落錯波纜點知中正膽，亦有人搓唔好餅底，而創出以龍脷底做Pizza；講緊係今日受訪嘅蔣太，佢嘅好運好似喺晒廚房！佢話仲有一次燒嘢食，俾佢符碌開發了柚子蜜雞翼㖭；有時一味好菜是要點點運氣，加大膽創意碰出來，成日板板眼眼跟菜譜煮，又點會好味過前人呢？
記者：葉雪芯 攝影：林栢鈞 示範：荃灣讀者蔣太
茄汁龍脷柳Pizza酸甜醒胃
價錢：$16/2人份
需時：15分鐘
Pizza惹味係人都認同，好多人都鍾意食，蔣太都唔例外；有次佢喺屋企試做，點知個餅底點都搓唔靚，煮出嚟硬係好似蛋糕咁脹起；於是佢靈機一觸，以薄薄一片的龍脷柳當餅底，加上Pizza惹味精髓嘅茄汁同芝士做餡，酸酸甜甜勁開胃之餘，最緊要做法超低難度，真係日日整都得，而且魚肉仲要比充滿澱粉質嘅麵粉餅底，食得更有益㖭！
材料：龍脷柳1塊、蘑菇1/4罐、菠蘿5片、芝士1片、洋葱半個、橄欖油1茶匙、茄汁4茶匙、鹽、胡椒粉少許
龍脷柳$24.9/454克（b）
蘑菇$12/100克（c）
菠蘿片$5.8/234克（b）
簡易法
1.龍脷柳洗淨吸亁水，用鹽、胡椒粉、油調味；
2.將洋葱放於碟上，加少許橄欖油，先放入爐焗3分鐘；
3.將龍脷柳放在洋葱上面，塗上茄汁；
4.在龍脷柳上鋪上蘑菇、菠蘿和芝士，再放入爐焗6分鐘即可。
貼士：焗爐用普通多士焗爐即可。另外，放洋葱在龍脷柳下可吸收魚的水份，令味道更佳。
黃金寶盒全齋夠健康
價錢：$20/2人份
需時：20分鐘
平時食得肥膩嘢多，食吓齋清清腸胃都幾好，但又驚口淡淡！蔣太想出以街邊「三寶」風味作招徠，再以素食食材釀入其中，豆腐卜皮香香脆脆，配上泰式甜酸醬，一啖一個勁開胃，𠱁得家中小孩食不停！
材料：豆腐卜10粒、粟米半罐、馬蹄10粒、冬菇5隻、葱、蠔油少許
豆腐卜$14/斤（a）
粟米（罐）$7.9/400克（b）
馬蹄$6/斤（a）
簡易法
1.將粟米、馬蹄、冬菇切粒，加入蠔油略炒；
2.釀入豆腐卜內；
3.將豆腐卜煎香，蘸泰式甜酸醬吃。
貼士：豆腐卜本身已有油份，煎時可以不用油，會更易有香脆的效果。
柚子蜜雞翼比蜜糖更香口
價錢：$20/2人份
需時：15分鐘
叉燒醬、蜜糖整雞翼就聽得多，柚子蜜？蔣太都話未聽過！有次同家人旅行燒嘢食，任職飲食大隊長嘅佢竟然帶漏蜜糖，反而飯後清熱下火嘅柚子蜜就成樽擺喺度，「為免俾家人怨言，於是搵樽柚子蜜出嚟，頂住當蜜糖！」點知燒出嚟同蜜糖一樣香，仲有陣陣柚子香味！
材料：雞翼10隻、柚子蜜2茶匙
雞翼$8/磅（c）
柚子蜜$45.9/千克（b）
簡易法
1.將雞翼煎至金黃；
2.將柚子蜜加少許醬油塗在雞翼上，再煎片刻便可。
貼士：在雞翼中央用刀𠝹開可更為入味及容易熟。
涼拌大菜絲爽口清涼
價錢：$18/2人份
需時：15分鐘
大熱天時日日30幾度，真係令人無晒胃口！如果有啲涼浸浸嘅嘢食，就梗係醒神啦，蔣太發揮佢嘅「混醬」本領，調製出沙律芝麻醬，加上青瓜和大菜絲，口感清脆，一個字，爽！
材料：大菜絲4両、青瓜1/4條、甘笋1條、蟹柳4條、芝麻醬4茶匙、沙律醬4茶匙
大菜絲$6.9/10克（b）
青瓜$8.5/100克（c）
蟹柳$13.9/227克（b）
簡易法
1.大菜絲用開水浸透，吸亁水份；
2.青瓜、甘笋、蟹柳切絲；
3.將芝麻醬和沙律醬拌均勻；
4.將大菜絲、青瓜、甘笋、蟹柳放在碟上，再淋上拌勻的芝麻醬和沙律醬即可。
貼士：用冷開水浸大菜絲會較爽口，若想大菜絲軟一些可用溫水浸。
鮮蝦麵豉湯味清鮮甜
價錢：$27/2人份
需時：20分鐘
放工後有啖湯飲吓的確是人生一大享受。蔣太咁忙，又點會有時間熬一煲老火靚湯呢？佢就用了日式麵豉醬自煮日式麵豉湯，有豆腐、小棠菜、蝦仁，用料夠晒十足，營養又好，清清哋，唔想食飯，飲碗湯都好呀！
材料：日式麵豉醬3茶匙、豆腐2件、小棠菜半斤、蝦仁、薑片少許
日式麵豉醬$30/500克（c）
小棠菜$8/斤（a）
蝦仁$56/斤（b）
簡易法
1.煮滾開水，加入日式麵豉醬，攬拌均勻。
2.放入薑片、豆腐和小棠菜。
3.水再滾後加入蝦仁，待蝦仁熟後即可上桌。
貼士：加入蝦仁後立即把火關掉，利用剩餘的熱力把蝦灼熟，蝦仁便會更爽口。
（a）沙田正街街市
（b）沙田好運中心百佳超級廣場
（c）沙田新城市廣場city'super
＊以上價錢以7月11日為準