侍仔：各位，今日我要幫施丹平反！佢嗰下頭槌，係因為杜明尼治嘅失誤而撼，可憐嘅馬特拉斯就咁變一隻棋。
招積域：你係咪儍咗呀？施丹都未講嘢你就咁亂講？你拿拿臨執枱算啦，一陣老細又鬧你啦。
侍仔：施丹係極度唔妥杜明尼治，對由佢初初組軍到決賽周嘅領軍能力嘅怒火，都喺嗰一下頭槌爆發出嚟。
招積域：仲有呢？快少少講啦，我好趕時間。
侍仔：好，杜明尼治呢個無膽鬼，當初搞到法國隊差少少出唔到線，就只識搵施丹呢班老人家出山，但就硬係唔肯搵古利，一個連施丹都認為係自己代替品嘅球員。去到決賽周，又總係唔用查斯古特正選，臨完場先換查仔入場，你哋唔見施丹好嬲咩？用古利、查仔都係施丹意願，但杜明尼治係都唔肯聽！
招積域：即係施丹覺得繼續踢都係無前途，為法國隊將來而悲哀，所以一頭撼落馬特拉斯度？
菠蘿文：但施丹拎紅牌有前科啦，侍仔你今次都幾有想像力喎。
侍仔：一個可扭轉亁坤球員，竟然喺一個無膽兼無能教練麾下，去到關鍵時刻係幾咁無助同孤獨！佢整親膊頭時想換出，但軍醫夾硬「整」番好佢，之後施丹已經無晒氣，杜明尼治又唔肯換人，施丹愈諗愈躁，就借馬特拉斯過橋，同杜明尼治一拍兩散！
文：高洛文
(逢周一至周五刊出)