有成50年歷史嘅太平地氈，噚日發出通告，話接到大股東通知，佢持有嘅55.46%股份，經已喺7月6日轉到電王米高嘉道理名下。驟眼睇好似冇乜嘢，只係一啲簡單嘅股權轉移，但係原來喺同一日，電王另外兩間上市公司都有同樣動作。
三間公司都冇講到點解要咁做，華華唯有自己估！三家公司原本嘅大股東都係一啲信託基金，受益人係嘉道理家族嘅一干人等，經過咁多年之後，最終集中番係一個人手上，會唔會係為咗日後分開發展而鋪路？抑或係嘉道理家族準備做大動作嘅先兆？
講番太平地氈，佢係由包括嘉道理爸爸、羅蘭士嘉道理嘅八位股東，喺半個世紀前創立，由韓戰禁運中國手織地氈所催生，體驗咗危中有機嘅真理。𠵱家中電腹背受敵，先有中港電力CEO公主李小琳供電到沙頭角，再嚟中石化母公司嘅供氣計劃，唔知嘉道理有冇諗到好計仔呢？