賭王何鴻燊千金何超儀嫁入陳子聰家門，眨吓眼已經接近三年，平日佢哋兩公婆最鍾意同朋友夜蒲消遣，但點都諗唔到，超儀竟然同老公帶埋老爺奶奶一齊去中環蒲吧，確係夠晒新潮。
前晚八點鐘左右，超儀出動七人車載陳子聰同老爺奶奶去到位於中環歌賦街、由許志安緋聞女友兼助手「細佬」開設嘅酒吧消遣，到場後四人直達樓上嘅VIP房。直到大約十點左右，陳氏一家飲飽食醉之後先至離開。
兩老拍拖夜遊
早排陳子聰曾經醉酒鬧事，仲同記者發生衝突，但前晚雙親在場，當然唔敢放肆，走嗰陣見佢都好清醒，個樣仲好有威嚴，幾有大男人feel㗎，至於超儀就負責照顧兩老，仲四萬咁口勁好笑容，成個好新抱咁款。
之後子聰雙親都唔阻囝囝兩公婆二人世界，喺酒吧門口同佢哋拜拜後就離開。滿頭灰髮嘅陳爸爸身材略胖，面色極佳，同太太由歌賦街拍拖夜遊到皇后大道中嘅中遠大廈附近，逛足十分鐘至一齊坐的士返歸，都好浪漫啫。
