禮拜一晚，孫柏文一邊上網打機就一邊睇電視，所以就轉台去睇啲新聞台。原來我哋特區立法會請咗曾蔭權特首去立法會答議員問題。原本都冇乜嘢，不過我上網打嘅機開始緊湊，所以我將電視機嘅聲熄咗，希望來個「絕地反擊」，等嗰班自稱居住喺大埔嘅中三學生唔可以咁快「搞掂」我同我喺滑鼠上嘅金手指。
點知，正當我全神貫注望着電腦畫面嘅時候，突然喺眼角見到李柱銘議員除呔。我第一個反應就諗，李議員一係被前晚「香港先生選舉」感染，知道赤裸上身，展示「六嚿腹肌」，可以為佢喺08年參選連任爭取女性選票鋪路，一係就佢「巴士阿叔」上身，知道「普選未解決」，所以除呔希望同曾特首「隻揼」。
所以開番電視機聲，睇吓李議員搞乜鬼。有聲之下一睇，先知道原來李議員想曾特首自己衣服上都隨便啲，除煲呔、除上裝外套。希望特首可以起到帶頭作用，令到全特區嘅市民都會着少啲衫，繼而開少啲冷氣，用少啲電，做到節約資源、保護環境，最後改善特區空氣質素。
原本我都反射式支持，因為男人咁多個器官做決策，個腦嘅排名入唔到三甲，特區市民着少啲衫，我就有大把機會流唾液。不過，李議員呢個建議始終都有經過我個大腦，亦經大腦分析之後，我就覺得呢個建議好準確反映今日特區政客、「政治家」嘅心態。
取其所需、給其所能
首先，唔好講用少啲電係唔係可以改善，因為華南地區「人命唔值錢」，所以有好多空氣污染，被啲廢氣吹咗來影響嘅特區空氣質素。不過，如果想用少啲來電節約資源，最簡單直接嘅方法，就係令到電費更加昂貴。利用人類想慳錢嘅貪念，去達到保護環境嘅目的。
大家覺得李柱銘議員為精神領袖嘅民主黨，會夠膽咁做咩？佢哋覺得只要曾特首除下煲呔，我哋特區人民就會自自然用少啲電。一邊廂永遠大喊：「減電費！」另一邊廂就要人用少啲電。咁嘅政策方向需要壓倒人類「見平就唔使慳住用」嘅自然反應，所以你話佢哋係唔係可以執政呢？當然，佢哋民主黨見到咁樣嘅難題，多數都會支持動議「要求政府研究點樣可以壓倒人類嘅自然反應」。就算動議通過唔到，都可以算交差，話政府唔合作。
大家可能問：「民主黨議員嘅質素就係咁㗎啦，唔通孫柏文你反對普選？」錯！因為𠵱家冇普選嘅政府仲衰，諗住搞啲白癡「反自由競爭法」。消委會陳黃穗，話喺公屋安裝鋼閘嘅鋼閘商，競投房屋署工作嘅時候，預先傾好，跟着一齊把價錢抬高，令到政府浪費納稅人嘅錢。
其實點解會出現呢個情況？大家可能會問：「初級經濟學書籍都有話如果出現壟斷，有人牟取暴利，就會有天賦貪念嘅新競爭者出現，去搶市場。點解今次冇？」答案係，政府有個「經過細心挑選」嘅特約承辦商名單，只有名單上嘅鋼閘商先至可以競投，而呢個名單又好難入。你做承辦商，明知道有政府嘅庇蔭，仲唔跟住自己天賦嘅貪念去搵錢？
所以我問大家：「利用人類嘅自然貪念去達到政策目的容易啲？定係好似佢哋咁壓倒人類嘅自然貪念容易啲？」大家最終要記得，壓倒人類嘅自然貪念去達到政策目的，就係計劃經濟嘅神髓，你真係會「取其所需、給其所能」咩？
孫柏文