恒指回落113點，但大市氣氛冇事，上升股份數目同下跌股份數目幾乎相同。短線炒窩輪，跌市時低位買C輪，好過市升之時買P輪。
恒指C輪3659：睇位買恒指C輪3659。隻輪10月尾夠鐘，輪價23.1仙，溢價3.4%，槓桿率19.3倍（有效11.5倍），引伸波幅19.5%。恒指每變動1%，隻輪理論上落12%。
3686亦係與3659同日夠鐘，亦係活躍恒指C輪，昨日跌幅4.8%，細過3659嘅9.4%跌幅，數據冇3659咁靚。
網通C輪9704：番薯梁真有錢，𡁻起小小超批電盈（008）。電盈跌8.1%，連帶網通（906）亦跌5.2%。
電盈跌，關網通乜事？揸兩成電盈嘅係大陸嘅網通，唔係906，水退船低都係906喺大陸嘅母公司嘅事。吼住網通C輪，雞仔注博反彈。9704昨散19%，有得諗。隻輪12月上旬到期，溢價7.8%，槓桿率6.9倍（有效4.6倍），引伸波幅40.5%。
電盈C輪：電盈仍fall，3隻C輪散落去，跌幅26%至53%。熱門貨4464有26球易手，9月尾夠鐘，輪價21.5仙，溢價12.1%。電盈股權嘅嘢，曲終人散，股價難以大升，咪搞4464，亦咪搞其他兩隻C輪。
章盛