一如左丁山所料，意大利贏得世界盃，但估唔到贏得咁辛苦，左丁山雖然事前預料意大利贏，但臨場睇見施丹表現出色，感情上好希望法國捧盃，等呢位一代球王可以騎駿馬跑入夕陽，構成荷李活電影劇本，大團圓結局，為施丹一生功業，寫上完美句號。嚡，萬萬估唔到，施丹以後幾十年都會俾球迷懷念嘅，竟然係佢用頭頂撞意大利中堅馬特拉斯而被紅牌趕出場嘅鏡頭，呢一幕，全世界電視會播完又播，播足幾十年，成為施丹一生之痛，紅牌出場之後，施丹唔可以留在場內，冇得攞獎牌，更唔可以與全世界球迷講拜拜，佢在更衣室內痛悔之時，電視機前十億球迷亦心有戚戚然。剎那間之瘋狂，營造永恒之遺恨，施丹呀施丹，嗰一刻你究竟做甚麼？
施丹出場之前，雙方打和，互射十二碼嘅形勢，十分明顯，如施丹唔出場，佢一定係第一位法國球員射十二碼（教練講嘅），有佢喺度，法國會唔會射輸十二碼呢？球迷可以為此辯論不休。雖然歷史冇如果，但如果施丹喺加時比賽時之一傳一頂，妙到毫顛，而唔俾保方救出嘅話（令人諗起七○年比利頭球俾英格蘭門將賓士救出嘅鏡頭），施丹已成為法國民族大英雄，英雄與狗熊之間，分別竟是如此微小。
平情而論，意大利打得好保守，全憑固若金湯嘅防守，先至可以守和主動進攻嘅法國。法國門將巴夫斯根本未受考驗，救波都未試過。法國亦唔多夠運，三員大將韋拉、亨利、施丹分別離場，注定輸波。到咗射十二碼之時，意大利球員就犀利咯，腳腳射死角入網，巴夫斯連波皮都摸唔到。法國都射得唔錯㗎，查斯古特射中門柱不入（其實佢細力啲就會入，保方已捉錯路），已叻過林柏特、謝拉特多多聲啦。
自七○年以後，意大利每十二年入一次世界盃決賽，每二十四年攞一次世界盃，下一屆喺南非舉行，時值南半球冬天，氣溫在十幾二十度左右，益晒歐洲隊與南美隊，大膽啲預測，西班牙大戰阿根廷爭冠軍。