香港唔單只喺經濟上作為外國與中國之間嘅橋樑，喺推動兩岸融合交流上亦可發揮橋樑作用。好似噚日舉行嘅「兩岸情懷、四地連心」海峽兩岸青少年交流研習營（圖），由香港成立嘅海峽兩岸青少年交流基金會主辦，主要目的就係畀嚟自台灣嘅大學生，認識中國大陸國情。
呢個研習營請嘅主禮嘉賓係政制事務局局長林瑞麟，佢致辭時大打官腔，話隨着香港同澳門回歸，中國已解決咗歷史遺留落嚟嘅兩大問題；而佢希望藉住今次嘅交流，加深台灣學生對中國嘅認識，並將所見所聞跟同學分享；佢又話，年輕人將可影響兩岸未來關係發展，相信只要兩岸人民同心，第3個歷史問題可以解決。咁識講嘢，京官都有得佢做。
呢個交流團有114名大學生嚟自台灣，17位嚟自香港，19位嚟自澳門；共有12日旅程參觀香港、澳門、廣州、北京、南京、蘇州同上海嘅大學同旅遊點。由美籍華人陳啓宗（圖左二）間恒隆、新世界同港龍等本港財團贊助。