零售銀行市場競爭激烈，部門主管要周不時執吓位，刷新思維，華華噚日同渣打香港區個人銀行業務主管洪丕正食晏，佢宣布3位個人銀行業務阿頭，最新內部調職，3位新主管清一色為女將，認真唔講得笑。
調動包括原本出任中小企業理財總監的吳家碧（Betty），調任個人銀行業務顧客經驗管理主管，Betty原本個位由原香港公共事務及亞太區投資者關係主管顧韻嬋接替，原本出掌顧客經驗管理主管嘅盧慧敏，就轉任信用卡及私人貸款業務總監。
阿Ben（洪丕正洋名）特別話，唔好以為佢哋個人銀行業務部主管全屬女將，其實亦有唔少男同事，佢話渣打呢家寶號，一向好着重平衡內部各個職級嘅兩性、族裔等比例組合，務求公平及多元化。