西貢環境怡人，啲低密度住宅尤其得外國人歡心，所以不時都有啲理想成交價出現，就算係村屋都一樣大把客爭住買，呎價分分鐘拍得住半山豪宅㖭。
宏億置業總經理方國珊報料，話西貢相思灣一幢臨海村屋，由同區外籍客用3400萬買入，呎價16190蚊，係區內村屋新高呎價，聽落係咪有啲誇張呢？
連6000呎花園泳池永久海景
她解釋話物業2100方呎，但附連6000呎入契花園同私家泳池，仲擁有180度海景，而且對出海邊已列為海岸保育區，即係買家可以擁有永久海景啦。
因此，個客睇完非常滿意，單刁3個禮拜就埋欄。不過，方國珊補充公司部署做呢個盤，已經有兩年咁耐。
呢幢超級村屋，原來業主都係猛人同名人，藝人謝賢一手向原居民直接購入，88年用250萬賣咗畀歐洲國家嘅領事；咁啱個領事退休，諗住去亞洲其他城市住，先至肯賣屋。
個單位揸咗18年勁賺3150萬，升值12.6倍，睇怕賺樓價升值重好搵個做領使份糧。
對上一宗村屋呎價紀錄喺今年2月錄得，係大坑口村118號，呎價11905蚊。
電郵地址：[email protected]
