侍仔：忙到一頭煙，都唔明點解間舖裝修又關我事，又要我返工，放工要我幫手執舖，但又唔計我超時嘅補水。
招積域：做咩事要裝修呢？𠵱家呢個格局都唔錯呀，幾有睇波feel。你老細又話蝕錢但又拎錢去裝修？
菠蘿文：但我覺得過咗世界盃，就要用另一個新look示人㗎啦，唔通8月份仲係掛滿晒32強國旗咁out咩？
宜多留意轉會消息
侍仔：佢點樣裝修我就唔知，不過我自己就要幫埋手囉！執枱又係我，天花執漏都係我，真係有冇搞錯！
招積域：算數啦侍仔，能者多勞，做多啲冇壞嘅，最多我去完東歐旅行之後醒啲料過你啦！我呢個職業賭徒，經過失意嘅世界盃後，要反思一下投注策略。
菠蘿文：見馬會個網又有日職、北歐波同巴甲賭，呢啲波係咪咁好賭㗎招積域？
招積域：我就專注4大聯賽，嗰啲偏門嘅就唔玩喇，得閒睇吓就算，費事又蝕畀馬會啦，倒不如趁空檔唞吓好過。
肥牛：留意吓轉會消息好過啦，賭波都要睇埋軍情嘅，咪淨係睇數目字咁簡單。
招積域：咁數目字都有佢代表性嘅，好似意大利射12碼咁樣，決賽射5球全部入晒，你之後睇意大利射12碼都定啲啦。
菠蘿文：世界盃完咗，個人好似若有所失，要變番正常時間作息。睇報紙話通宵睇波，會有乜嘢顛倒睡眠症喎。我𠵱家記性差咗咁多，會唔會有事㗎？
侍仔：你休息一吓就冇事啦，𠵱家個個都做到成隻嘢咁，有時覺得自己冇病痛係咪等於唔勤力做嘢？
招積域：每個人身體質素都唔同，無病是福。
文：高洛文