代理為咗增加公司曝光率，對於市場消息好多時會嗱嗱聲出稿，但有時出街嘅消息都未必係百分百準確。
中記上個禮拜話資深投資者廖湯慧靄用1800萬買入灣仔摩利臣山道舖位，比業主意向價高100萬，當時蘭西都好奇問過點解，佢哋就解唔到畫。噚日中記出稿，話原來單成交唔係高過業主意向價，只不過係公司攞咗好耐之前個放盤價比較，唔知期間業主意向價已經有改動，查實都係市價水平。
由於單刁係由廖太細佬出面搞，所以中記除咗向廖太致歉外，仲包埋湯生等人。
不過，中記早幾個月前報料，話裕記用1500萬買咗觀塘瑞和街14至20號地下B號舖，520呎，呎價逾3萬幾。最近裕記就否認有買舖收租，問番中記都認事後發現有錯，但一直都冇澄清過，咁就有點兒那個嘞。