昨日大市先跌後回升，但成交仍然相當奀，只得二百零億元，睇嚟後市方向仍然未明。至於上周末提過炒越南概念的陸氏實業（366），昨日一度炒上至1.75元，收1.64元，仍升7.19％。
經紀黃話，陸氏喺早年已投資越南的地產及水泥業務，呢個越南概念喺本地股市相當罕見，但股價突然升得咁急，主要原因係街貨疏，當中不乏投機買盤，有興趣嘅讀者可以睇定啲先至上車。
買盤勁過沽盤
除陸氏矚目外，其實即將在下周二公布全年業績的大昌微線（567），成交雖然唔大，但升幅就凌厲，唔使問阿貴都知道係憧憬業績靚，查實大昌微線中期業績已經轉虧為盈賺2578萬元，如無意外全年業績應唔差。
不過，小初就覺得有啲奇怪，大昌微線有位持貨量唔少的股東，近幾個月來頻頻減持，但股價不跌反升，昨日升13％，收1.04元，成交金額550.7萬元。
慕容小初