大嶼山愉景灣自83年第一期物業落成之後，到𠵱家嘅發展都冇停過，唔經唔覺已經起到第13期，夾夾埋埋有成7500個單位，可以話係全港唯一一個，由80年代至今日，廿幾年嚟一直有新盤推出，歷久常新嘅住宅項目。
愉景灣就好似發展商香港興業湊大嘅BB仔，𠵱家已經成年嘞，都係時候重溫番佢成長嘅片段，近期就搞咗個80年代愉景灣相片大募集嘅活動，誠徵80年代愉景灣面貌嘅相。蘭西估計，當年首批喺愉景灣住嘅居民，相信會有唔少當地嘅風景或者生活相，好似蘭西細個喺屋企樓下公園玩，都影落唔少相，一直保存到𠵱家。有嘅話不妨攞出嚟同發展商分享，應該幾有趣，又可以對比吓同𠵱家嘅變化，諗落都幾好玩。
另外，愉景灣第一期碧濤已經落成咗23年，近期嘅翻新工程竟然引起居民不滿，仲喺網上同報章投訴。發展商解釋，承建商低估咗工程嘅影響範圍，加上受天氣影響進度，工作小組已經加緊監督工程進展，仲經常開會，歡迎居民出席同發表意見。
都啱嘅，喺呢啲火紅火綠嘅時候，係應該打吓溫情牌嘅。