電盈世紀賣盤場戲，高潮一浪接一浪，搞到班財經記者頭都大埋。華華噚日一睇完波，七點鐘就仆到花旗銀行大廈，吼吓班電盈大粒佬會唔會爆料。肯蒲頭嘅有李智康、霍德、羅保、艾維朗同張信剛，但係個個都鬼死咁口密。其他高層人影都唔見隻，小小超就當然繼續失蹤啦！等咗成粒鐘，忽然間有個實Q話：「佢哋上晒去開會。」九成九行秘道。
最唔好彩個天忽然落大雨，成班行家鬼咁狼狽，惟有拉大隊入大堂避雨，花旗嘅實Q已經勁唔好老脾，當天色稍好時即刻聲大夾惡：「你哋仲唔走，信唔信報警拉晒你哋！」不過，佢哋原來只係喺中國人面前威，對住洋人就粒聲唔出，好似有外國記者喺𨋢口搭晒腳架，冇人趕；有印度人公然喺度兜售20蚊飯盒畀鄉里，一樣冇人理！
記者亁等14個鐘
查實好多行家前晚都係睇完波就過嚟等小小超，等咗成個上晝都唔敢行開，餓到嘰喱咕嚕，差啲攰死。好彩有個港台女記者喺場外發起買飯大行動，集資600幾，買咗22幾盒叉雞、三寶飯咁，之不過有人混亂之際冇畀錢，惟有每人愛心捐出兩蚊雞補數，幾十個記者踎喺地下食飯，場面不知幾壯觀！
食完飯大家生猛晒，但係電盈班公關就成日放流料，又話五點半小小超會見人，點知愈拖愈耐，搞搞吓花旗lobby聚集咗起碼200個中外記者，連美國、內地傳媒都嚟埋，大家亁等咗14個鐘，電盈就一啲表示都冇。
最尾喺8點零先派吓蛋撻同礦泉水，卒之到咗8點9，小小超終肯蒲頭，但係齋讀份聲明唔答問題，真係令人失望！電盈已經搞到高追嘅小股民年年憂戚，賣股都搞到班記者冇啖好食。
李華華
讀者如有任何意見或報料，歡迎發送電郵至
[email protected]。