八方先前都講過，即使世界盃打完，但大家一樣唔愁冇話題，事關電盈賣仔，日日有料到，好似噚日咁，直頭就係「二少日」，由早到晚，只要有少少風聲，嗰個地方就會熱鬧到暈，當中受惠嘅除咗電盈大本營之外，仲有一早出晒通告，話小小超會到場做嘉賓嘅香港國際青少年合唱節酒會。
個酒會7點喺文化中心開波，大班傳媒早早到場擺好陣，目標就梗係李二少啦，雖則大部份記者都心裏有數，知道楷楷九成九唔會現身，但萬一爆大冷真係輸唔起，所以即使一早打定輸數，都等到夠鐘先走人。
雖則小小超冇到，但主人家青協總幹事王䓪鳴一樣咁High，在場內同環境運輸及工務局局長廖秀冬，同埋政協委員藍鴻震，三個圍埋一齊，傾到雞啄唔斷。
丹琍攝