法國球王施丹在退役前最後一場重要賽事、也是關乎國家榮辱的世界盃決賽中，突然以頭槌頂撞意大利球員馬達拉斯，結果被判紅牌出場，在結束球員生涯時留下污點。施丹此舉令全世界球迷震驚，娛圈中人亦議論紛紛，梁漢文為他晚節不保感到惋惜，更一見人即模仿球王頭槌動作，劉德華則表示體諒施丹的舉動。
劉德華–維護尊嚴
當球證攞紅牌對住施丹，我胸口好似受咗一鎚，心跟住往下沉。我唔知道意大利球員對佢講乜，佢明顯想忍，不過最後都係決定回頭反擊，施丹應很清楚，佢選咗自己尊嚴，洩咗個人心中之憤，但就辜負咗所有隊友同球迷嘅厚望。施丹都係人，有佢情緒同底線，八年前我欣賞佢，今日我仍然欣賞佢！
梁漢文–即時發呆
我平時流緊英格蘭嘅血，但我其實係法國人，梗係捧法國隊，施丹被紅牌離場嗰吓我都呆咗，總之就失望啦！
Rosanne–悲劇英雄
我一向都鍾意意大利，原本諗住法國會贏，因為施丹係法國英雄，但佢攞紅牌出場就好唔抵囉。
（無綫）李克勤–有型之舉
我覺得又冇嘢喎，我覺得佢好型，我唔介意意大利個球員同佢講乜，可能問候佢屋企人，挑釁咗佢先做呢個動作，好難講嘅，人之常情。
（有線）杜汶澤–頭功了得
法國雖敗猶榮，意大利係踢得好，要幾時輸幾時贏都得。至於施丹用頭頂人係佢俾人激嬲至係咁，佢平常都唔係咁。而且證明佢頭功了得啫。
（亞視）羅家英–晚節不保
好震驚！佢晚節不保，可能佢突然暴躁症！我真係有啲失望，情況有啲同英格蘭一樣，冇碧咸冇朗尼，可能對方講咗啲關於種族歧視嘅嘢，令到施丹打佢。
