相信好少人估得中，恒指昨日會有144點進賬。港股由跌變升，由日股帶動。日股升，係因為銀行股生猛，當中住友銀行一升就係6.6%，做咗日經指數第一威水成份股。
恒指升，滙控（005）進賬1.90元，帶起68點，貢獻最大。喺國內，又係銀行股領風騷，招商銀行升2.4%。銀行股同相關C輪，要望多幾眼。
中行C輪9446：31隻中行C輪同兩隻P輪，昨日登場。最多買賣嘅係C輪9427，發行量100球，成交289球，金額1.2億元。開市頭10分鐘上車（最高價48仙），到收市38.5仙，已經艇兩成。
9427明年1月尾到期，溢價10.1%，槓桿率9.3倍（有效5.5倍），引伸波幅32.2%。
9427數據唔講得靚，睇好正股（3988），不妨諗9446。隻輪明年1月中到期，輪價35.5仙，溢價6.2%，槓桿率10.1倍（有效6.6倍），引伸波幅24.9%。9446拍埋9427，數據靚好多。
建行C輪4505：中行睇好，建行（939）亦唔憂冇上升空間，揀啲C輪短炒。
4505諗得過，10月中到期，輪價38.5仙，溢價4.2%，槓桿率9.2倍（有效6.5倍），引伸波幅32.5%。想穩陣啲，贏輸冇咁大，則諗2275。有啲建行C輪溢價喺15%以上，風險好大，咪手痕。
章盛