【本報訊】香港球迷偶像施丹頭攻馬特拉斯，紅牌被逐，卻獲封金球獎得主，一時間，正邪莫辯，成為城中熱門話題。在互聯網討論區上，球迷分成正反兩派，有人力撐施丹實至名歸，也有人把一代球王喻為旺角爛仔，失望之情溢於言表。
施丹是香港球迷的偶像，從近期的施丹燙字球衣賣到斷市，已可見一斑。這位法國球王戲劇性結束球員生涯，為本港球迷帶來極大震撼。在一個以世界盃為主題的討論區上，昨日有數以百計留言，激烈討論事件，言論大致可以分為支持與彈劾施丹兩派。
指挑釁是「人渣」
有球迷認為，即使領紅蒙污，但施丹仍是當今最佳球員：「雖然尋日咁躁，俾人紅牌踢咗出場，不過精采球技同埋帶領差點外圍賽已經出局嘅法國打到入世界盃決賽，有幾多個球員可以做得到？」
施丹忠實擁躉甚至怪罪馬特拉斯，指他的挑釁是「人渣」行為：「決賽當晚，這位人渣（馬特拉斯）喺拉完施丹後講咗啲挑釁性辱罵嘅嘢，令施丹不顧一切用頭反擊嘅動作，說話嘅內容一定係極度刺耳難聽。」
十億人前做爛仔
也有球迷批評老路縱橫的施丹，不應小不忍亂大謀：「呢啲行為喺意大利聯賽係家常便飯，施丹喺意甲打咗幾多年？口角幾句、俾人攬兩吓就打人？咁同啲MK（旺角）仔俾人寸兩句就打人有咩分別？一代『球王』喺成十億人面前做啲爛仔行為，仲可以有咁多人同情佢，真係厲害。」