踢咗成個月嘅世界盃,噚日曲終人散,意大利成為終極王者,呢支賽前冇乜人睇好球隊,12碼激走法國,仲搞到施丹英名盡喪。意大利做世界盃阿一,雖則搞到一地眼鏡碎,但同時又驗證咗UBS瑞銀嘅獨到眼光,事關呢間歐洲大行喺開波前7個禮拜,已經貼意大利係冠軍喇!
瑞銀喺4月21號發出嘅投資報告度,預測決賽應該係巴西對意大利,但計過度過之後,意大利嘅贏面就有5成4,結果真係畀佢貼中。除咗瑞銀以外,高盛喺5月都出咗份「TheWorldCupandEconomics2006」,不過佢哋就估巴西會捧盃,真正王者意大利只係排第9位。