曾志偉、何超儀、毛舜筠、原子鏸、林苑等，噚日喺灣仔一間酒吧拍《大丈夫2》外景，劇情講成班女人一齊去叫鴨，仲飲醉酒。其實前幾日超儀已經要拍場飲醉酒戲，佢想效果好，真係飲咗半支紅酒落肚，結果醉埋，戲拍唔成，之後佢竟然走咗去探金城武《傷城》班。
「周圍撩事鬥非」
舒淇勁冧金城武，估唔到連超儀都一樣，超儀同馮仁昭話：「我本來係去《傷城》嘅外景場探個朋友，點知去到淨係識搵金城武，佢（指金城武）真係OK，邊個敢話佢唔OK呀！我哋識咗10幾年，不過佢同我講完句你好嗎之後，我已經唔記得所有嘢，連劉偉強扶過我上車同我點樣返屋企都斷晒片，所以今次再拍醉酒戲，我決定唔嚟真。」
超儀自爆飲醉酒會好寸，佢話：「我16歲醉過一次，嗰次飲醉酒，人哋話我寸霸，似大爺咁，周圍撩事鬥非，之後我就唔多飲酒，我13歲就出嚟蒲，早熟嘛！」
