容祖兒（Joey）、曾志偉、劉德華、黎明及鄭裕玲等，昨日齊齊出席無綫收費電視娛樂新聞台開幕盛典。志偉早前為該台拍攝宣傳片時，指Joey可教人整容，昨晚Joey反擊說：「我可以教佢查黃頁搵整容醫生。」
曾被指出道至今樣貌變化頗大的容祖兒，對於曾志偉在宣傳片中揶揄她可教整容，她昨日回應說：「我都係前兩日先知，我可以教佢查黃頁搵整容醫生，我唔識呢方面，大家呢件事上可以幽默化咁睇就幾得意。」
問Joey擅長教人做甚麼？她說：「啱聽同唔啱聽嘅嘢咪當耳邊風。」再問她覺得志偉擅長教人做甚麼時，她說：「佢講嘢心得。」
畀面撐場的華仔被問到可介意被攝製隊拍攝家居時，他說：「我87年曾經畀無綫拍過家居，不過都係20年前嘅事，當時我仲住喺廣播道，𠵱家間屋冇咁靚。」
黎明舊愛舒淇日前公開表示對金城武心動，他昨日也大讚金城武有男士魅力，問他覺得自己能否令人心動時，黎明說：「鍾意我嘅人會心動，但唔欣賞我嘅人都唔好動火。」
徐小明祝福
此外，無綫的收費電視娛樂新聞台，明顯是仿效有線執行董事徐小明三年前策劃成立的娛樂新聞台，連現時在無綫收費台任職製作總經理助理的余詠珊，之前也是效力有線。昨日徐小明在電話中說：「我哋都好開心，證明佢哋認同我哋嘅成績，咁𠵱家咪幾好，希望可以刺激成個行業，有多啲渠道畀演藝界，唔好壟斷。」
採訪：卓寶花、王崇穎
攝影：陳慧安、仇志德、陳順禎
