永樂電器（503）係典型嘅「惡股」，雖然上市時有大摩做策略股東嘅生招牌，但見過高價4.30元後，一話掉頭，就跌個不停，跌完可以再跌，仲跌穿上市價2.25元。大摩期間雖有出有入，但家陣仍持有3.6億多股，佔總股數15.4%。
「惡人」有回頭是岸之日，「惡股」亦有翻生之時。永樂呢輪已開始有番啲「股性」，由低位1.82元開始升番上嚟，噚日收2.075元，睇走勢，低潮已過，圓底收集已接近完成，未來的一兩個月，股價有機會重上3元水平。
永樂係中國第3大家電零售商，「晒士」同市場覆蓋網絡之大，唔使多講，但股價經過去兩個多月嘅「洗禮」後，拍埋同業一比，就明顯好偏低。家陣內地有名氣嘅零售股，PE都講緊20至30倍，平均數25倍，永樂僅一半多啲。
大幅落後於同類股
05年（12月年結），永樂營業額122.46億元（人民幣．下同），升48%；盈利2.89億元，升56%；每股盈利17.3仙，升44%。06年，集團分店大增1倍，覆蓋城市多咗，盈利上升，但每股盈利則因股數增加而攤薄至16仙，預測PE只係12.9倍。
睇埋P/B，永樂仲吸引。內地零售股P/B平均6倍有多，永樂只係2.08倍，低成65%。
大摩嘅報告亦指永樂股價過殘，為投資者提供入市機會，現價未有反映公司收購大中電器帶來的潛在利益，維持「增持」評級，目標價3.40元，有60%的上升空間。
永樂股價已重上10日線同20日線之上，而10日線亦已升越20日線，50日線（2.26元）係第一個阻力，升破後即可確認中期調整完成，以圓底兜上，目標係2.80至3元。
世盃曲終人散，一眾股民又再埋位搏殺。港股噚日低開高收，恒指曾跌過120點，但中段抽上，結果大升144點，收16603，距離短期上升目標16800愈來愈近。
大戶擺明要做個市上去，滙控（005）同中移動（941）成為主力催谷對象，短期大藍籌會輪流砌，大國企則因有好多窩輪到期，要過咗7月先會有作為。
郭兆誠