都唔知道我哋係唔係一個乜都從「賭」嘅角度睇嘢嘅社會，不過睇吓我哋特區各大傳媒分析世界盃，好多時候都係從我哋特區人民賭咗幾多錢嘅角度分析。孫柏文當然亦有參與賭博，因為我覺得經過細心研究同分析之後落注，結果輸錢，有助平衡心理。
我最喜歡嘅落注方法，就係俗稱「賭白頭片」或者稱為「篤手指」嘅落注方法，意思就係我唔需要用一分一毫，就可以賭錢，贏錢嘅時候就即刻收錢，輸錢嘅時候就當係向受注嘅人借錢，可以慢慢還。有人肯借錢畀我，都只因我「篤」嘅手指，係用金做！不過估唔到，世界盃踢完得嗰一日，就有一個人比我仲勁揪，「篤手指」都可以篤90億出來。
大家可能會問：「呢位人兄係邊個？佢又買啲乜？」佢就係我哋特區金融界傳奇，百富勤投資銀行創辦人、97年前被譽為「紅籌之父」、帶領當年科網時代天之驕子tom.com上市嘅梁伯韜。佢買嘅就係李澤楷控制嘅盈科拓展擁有嘅22.66%嘅8號仔電訊盈科股權。
8號仔願者上釣
呢個世界始終有人辭官歸故里，有人漏夜趕科場，李澤楷說再見，梁伯韜就sayhi。睇梁伯韜嘅記者招待會，有番鬼佬記者問佢：「你覺得出價貴定係唔貴？」當年孫柏文仲係分析員嘅時候，如果市場有單大交易，我老闆都鍾意問我哋分析員同一條問題，不過佢問唔係想知道「貴定係唔貴」而係想「陰」我哋。因為自由買賣當中，賣方一定覺得個價「夠貴」，買方一定覺得個價「唔貴」。
大家可能會問：「即係話買賣雙方，其中一個睇錯咗？」問得好，不過錯。
基本上，大家都可以當電盈係個結他，李澤楷同埋梁伯韜就係搖滾歌手，李澤楷只係可以喺紅磡體育館開演唱會，梁伯韜可能相信自己有能力去北京工人體育館開演唱會，所以先至出現呢個賣方覺得「夠貴」而買方覺得「唔貴」嘅情況。
不過，梁伯韜始終都係銀行家，唔係實業家，更加唔似孫柏文咁係互聯網信徒，所以可相信佢係過渡性人物。如果係咁，作為財經口水佬嘅我就發達，因為仲有排可以寫！
最後，提起「電盈」呢兩隻字，係會令到好多我哋特區人民欲哭無淚，不過，今次都算李澤楷對電盈股東「雪中送炭」咁說再見。佢好似喺神父前面嘅一個凡人，最後都攞十幾億自己嘅錢出來「贖罪」。計埋電盈將股票五合一，當年你如果用28蚊買盈科數碼動力，楷哥𠵱家畀番六仙你。大家如果要為李澤楷電盈年代畫上句號，始終都要公道，因為股票市場，你情我願，自由買賣。都係嗰句，姜太公釣魚，願者上釣！
孫柏文