世界盃正好完結，係時候收拾心情，將注意力放番喺啲認真啲嘅話題上面。進士見到又有港府消息放風話政府同深圳政府達成共識，年底研究中港第六個汽車口岸。消息指有關計劃主要係為咗配合中港運輸嘅急速發展，特別係配合貨運物流嘅發展。
有睇開進士呢欄嘅蘋果之友都知進士一向同合和SirGordon（胡應湘）嘅睇法一樣，港珠澳大橋唔起，香港經濟四大支柱之一嘅物流業都可以「收得皮」。
嗱！唔係進士吹水，連物流業界同政府嘅物流發展局都一致同意香港物流業未來發展嘅重點係開闢貨源，其次就係降低運輪成本，又喺落馬洲附近整多個口岸通去深圳，除咗「加強」幫深圳市政府方便香港居民北上消費之外，進士就睇唔到對香港物流業發展有乜幫助！
拖延港珠澳大橋伎倆
進士想對港珠澳大橋嘅StrategicValue再重新講多次，珠江西岸由於目前喺運輸基建方面仲係非常落後，所以發展並唔理想，但對比起發展咗幾十年嘅東岸，佢嘅地價同人力成本又相對地低。如果解決咗運輸問題，相信唔少新嘅投資者/生產商同埋已經落腳東岸嘅廠家會搬去西岸，西岸由於天然形成冇深水港，港珠澳橋亦正好做成「吸管效應」將啲貨帶嚟香港。
呢個時候推第六個口岸，大家心照啦！又係深圳市政府拖港珠澳大橋嘅伎倆。不過，進士太熟悉政府負責政策嗰班AO嘅心態，物流方面咁耐冇功課交，實說啲老闆接咗個研究當成果啦！
最識做官嘅葉澍堃，潛水嘅廖秀冬同埋集中注意力爭取連任嘅煲呔，替香港做啲嘢啦！物流發展局嗰班AO，霍建寧嗰啲意見就少聽啲，人家集團喺深圳個鹽田港佔咁大份！SirGordon份人就寸啲，但有point㗎！寫份ploicypaper時就唔好交行貨啦！