逢跑馬，左丁山必到馬場。到馬場，必然碰到簡文樂，到七樓遴選會員廂房搵佢，唔使預約。又或者到沙圈都得，簡文樂鍾意養馬，由以前嘅「先見之明」、「察察為明」，到𠵱家嘅「好耐力」、「五世其昌」、「天外有天」等等，經常有馬出賽。呢位馬主非一般玩玩吓，佢直情當投資基金咁做，與中華網站（china.com）創辦人葉克勇等夾份，聽講夾咗起碼成億銀，喺澳洲、愛爾蘭買咗百幾匹馬，希望其中有啲贏出一級大賽，然後做配種馬，收錢長收長有。咁嘅養馬大計，相等於做創業投資（venturecapital），一旦中正，回報率可以高得驚人。
簡文樂做生意好有創意，旗下嘅冠軍科技（092）與看通（1059）都好好生意，年年賺錢，冠軍喺二○○五年賺四億五千九百萬，看通賺一億二千七百萬，夠晒簡文樂印印腳。
消息傳來，阿Paul得到英女皇頒授勳銜，已經去咗倫敦，喺七月十二日入白金漢宮，接受女皇伊利沙伯二世御賜CommanderoftheMostExcellentorderoftheBritishEmpire（簡稱CBE）榮銜。佢成班老友預備喺七月十三日在《南華早報》刊登廣告去賀佢。左丁山問一位老友：「究竟Paul簡點解會得到英國政府欣賞？」老友話：「因為簡生過去多年在商界發展，科技開放及管理倫理（managementethics）各方面有卓越貢獻。」
攞英國CBE銜，並不容易，以往港英年代，要一啲資深行政立法兩局議員先至攞得到，再上一級就攞爵士。香港回歸之後，大家差不多唔記得咗甚麼MBE、OBE、CBE咯，只知銅紫荊、銀紫荊、金紫荊，大概CBE就等於金紫荊啦。簡文樂係香港人，喺香港做生意，特區政府有冇畀佢紫荊勳章，左丁山唔記得咁多，英政府頒授畀佢CBE，英國認真識貨。講起嚟，簡文樂係中大三年制MBA畢業生，佢位中大MBA校友周松崗（地鐵CEO）喺2000年得爵士勳銜，𠵱家輪到佢攞CBE，中大MBA校友會應該設宴賀一賀。