上網搜尋慕尼黑的資料，結果得到的大部份都是關於史匹堡導演的電影《慕尼黑》的網頁，真吹脹。
漢莎航空的經濟客艙不設私人電視，要看電影便得依時依候頭岳岳看着小螢幕，像驗眼一樣，看不了一會便睡魔急call，跟兩個外甥相擁入睡好過冚羽絨棉胎，十二個鐘頭的旅程分幾次睡，睡睡醒醒之間到埗。
以為踏出飛機世界盃氣氛便會撲面而來，怎知並無特別，關於世界盃的廣告當然有，但香港都有啦，並不少於慕尼黑㖭。
在網上預訂的酒店位於市中心，算新淨，只有約一百年歷史，在歐洲求其一間酒店都起碼一百幾十年歷史啦，並不詫異。德國的夏天艷陽高掛，難怪碧咸會跑到嘔，酒店不設冷氣，但勝在有落地大窗，日間有點悶熱，但夜涼如水，清風送爽，打開窗門睡一覺，翌晨起床渾身舒泰，其實瞓冷氣覺對身體真係麻麻哋。
德國的遊客地圖並不UserFriendly，睇嚟睇去睇唔明，街名亦動輒十幾二十個字母長，讀又讀唔出，聽又聽唔明。德國人亦唔算太Friendly，請留意，並唔係冇禮貌，只不過唔係太Friendly，面上笑容欠奉，相信嚴肅及認真係佢哋嘅民族特性，睇德國隊踢波便略知一二。
這次留在慕尼黑的日子只有三天，行程可以講得上是爭分奪秒……