賭權開放之後，同香港一海之隔嘅澳門，可以話係無限商機，唔少地產商、金融機構，都想打呢個市場嘅主意，有啲就明刀明槍，好似大新銀行咁；有啲就用軟功，澳門實德就係一例，總之各出奇謀，目的係乜？都唔使講到明喇！
舊年底收購咗澳門商業銀行嘅大新，早兩日喺馬交出第一張主題信用卡，動用佢哋旗下最受歡迎嘅吉蒂貓（HelloKitty）做餌，再加埋個會變色嘅卡面設計，又有唔少限量禮品畀啲客換，咁樣強攻之下，希望發卡量大豐收。
至於澳門實德，就用「世界遺產」做賣點，搵咗澳門文化局、澳門攝影學會、澳門電訊、誠興銀行等，合作搞咗個澳門攝影比賽，短短幾個月，就收到千八幅作品咁多，之後再出埋本作品集，順便宣傳佢哋內港個地產項目「十六浦」。軟銷又好，硬銷也好，最重要都係吸引到班買家啫。