陳太參加完遊行後，個個都信佢會行多一步，陳太上星期透露遲啲會有嘢同大家講，大家諗住仲有堅料爆，但點知等咗幾日都冇乜聲氣，反而係佢老友「媽打」李麗娟代佢講，陳太唔會出嚟選特首喇！
今日煲呔有答問大會，話唔定陳太想睇定啲先，聽吓煲呔講乜嘢再決定出嚟講乜。大狀黨湯家驊話，陳太7.1之後都冇再搵佢哋，又冇聽聞佢有乜活動。湯大狀又講笑話，唔知係咪俾啲傳媒嚇親，所以暫時唔想出嚟講嘢。
其實陳太都有難言之隱，如果你話有意向參選，咁就可能俾人抽秤，因為講咗就要計選舉經費，所以大家唔好咁心急，畀啲時間陳太，話晒萬事起頭難，既然陳太已經行咗第一步，之後嗰幾步點都會容易啲。