去鏞記食飯，遇見行會成員范鴻齡，佢話自己一連兩晚都喺度開餐，唔係屋企冇工人，只不過人到中年，好多朋友榮休，於是頻頻要餞別。佢仲講笑話，有個退休老友，以為唔使返工，可以一個禮拜去釣三次魚，點知就係一日喺屋企洗三次碗。
八方見到在場有好大棚人，范鴻齡話多數係佢啲同學，同埋佢母校聖芳濟書院嘅老師。原來當晚係餞別該校校長鍾修士，校長喺香港教咗二十幾年書，今個學年退休之後會去馬來西亞，所以范鴻齡同一班校友請佢食飯，佢哋又送咗個手提電話畀校長，等他日港馬兩地好保持聯絡。
范鴻齡上個月生日，58歲，應該有排未會退休，唔使擔心洗碗問題。不過佢話退休之後至可以實現嘅夢想──去現場睇世界盃，可能要8年、甚至12年後至有得諗喇。