侍仔：忙咗成個月，終於搞掂喇！世界盃曲終人散，可以暫時唞番陣，放番個大假，等開新球季再死過！
招積域：冇錯呀，我都要唞番1個月，檢討一下自己世界盃做乜事1場都未中過！！學費就畀咗，但就得個吉。同埋見旺角開咗間波衫舖，專賣塞黑贊助商嘅產品，得閒掃吓貨。
菠蘿文：我就要慢慢刨下各大聯賽球員嘅動向喇，睇下有冇乜嘢筍貨，等打機時候可以參考。上網見到葉士域治想簽嗰個千里達白人中場球員巴查，真係替佢開心，佢對巴林嘅附加賽幫國家隊一箭定江山，𠵱家由英甲變踢英冠。
侍仔：佢都只係冰山一角，但覺得大賽後買球員好儍，你見到嘅人人都見到，根本競爭太大！上屆費格遜買基巴臣，利記要法迪加同迪奧夫，結果雙雙中招，正一累己累人！
招積域：咁又係呀，話唔定世盃表現好已經係球員嘅頂峯，摸頂入市係儍仔所為，難怪費格遜同侯利亞俾人鬧到飛起，侯利亞後尾仲俾利記炒埋。
侍仔：球隊表現好，球員先會被吸引，正如上屆有塞內加爾一鳴驚人，所以有侯利亞呢個儍仔以為執到寶，但今屆少入波，加上賽果正路，碧根鮑華都話悶，又有乜嘢驚人收購呢？
菠蘿文：呢樣就好難講嘅，正如意大利球員要為前途而戰，可能你會見到派路喺英超踢波呢？唔知世界盃之後波衫會唔會減價呢？
招積域：其實間間唔同嘅，我知道有啲9折，有啲更加係7折；但有部份就堅持唔肯減。
侍仔：我就唔買波衫喇，世界盃都過咗囉。
高洛文