做咗5年半機管局行政總裁嘅彭定中，上月宣布唔玩，唔理佢係咩原因都好，機管局當務之急梗係搵人接班，佢哋搵咗獵頭公司SpencerStuart幫手，對方收到柯打亦即刻做嘢，除咗周圍哨睇吓有冇獵物可以挖角，SpencerStuart亦喺《南華早報》登招聘廣告。咁點先夠資格坐呢個位呢？
要求唔係好高啫，只要自問可以做一個傑出領袖，曾在大機構或政府部門擔任過管理要職，尤其曾應付巨大顧客層要求嘅工作經驗最吃香，對內地及香港政策熟悉嘅更佳。
年薪有成600萬
當然，如果曾在其他高增長嘅機場擔任過要職嘅可以優先，年薪有成600幾萬銀喎，各位想做打工皇帝嘅，自問夠條件不妨一試。
親疏有別睇背景
自從話彭定中唔玩之後，都有人惋惜，其實佢真係做得唔錯。
另外，又有風吹過話港龍航空行政總裁許漢忠有可能坐呢個位，咁既然有傳言話佢前途不明朗，換吓環境亦好正常，反正國泰吞咗港龍之後，一山點能藏二虎？如果許漢忠真係去機管局，咁機管局同國泰港龍就有一場好戲。不過，在呢個親疏有別嘅時代，唔係你有料就做得，仲要睇睇你咩背景，咁筍嘅工，好多人都想關照自己人呢。
李華華
讀者如有任何意見或報料，歡迎發送電郵至[email protected]。