唔知係咪因為陳太同葉劉近期好紅，馬丁都唔執輸頻頻亮相。噚日佢喺旺角街頭同郭家麒、史泰祖搞咗個反吸煙論壇，個天可能知道馬丁好少周街現身，大雨都為佢而停。
郭家麒話，政府未打官司已經跪咗喺煙草商面前，唔夠膽學歐盟等地同煙草商打官司，任由佢哋用大大隻「醇」字呃人，等人以為煙仔好「純」。
馬丁都非常唔妥政府拖延全面禁煙嘅立法，忍唔住要企出嚟。即使成街途人睇住，馬丁照樣講到好火滾，話政府「親疏有別」，口口聲聲「以民為本」，其實係「以煙草商為本」，批煲呔官商勾結，為煙草商開綠燈。
馬丁越講越勞氣，梗係啦，佢喺20年前港英時代就開始爭取禁煙，爭取咗12年先等到立法會cut剩一間217號房可以畀人吸煙。睇嚟馬丁除咗係「民主之父」外，仲係「禁煙之父」。