上周五，美股3M發盈警，股價散9%，拖低杜指58點，結果杜指唔見134點。美股唔掂，今朝日股亦難逃一跌，港股跟埋。恒指如果低開一二百點，可趁低揀C輪買，博低開高收，賺即日鮮錢。
交行C輪4657：吼交行（3328）跌啲，買C輪，選擇4657。隻輪10月初到期，輪價42.5仙，溢價4.5%，槓桿率11.8倍（有效7.7倍），引伸波幅29.1%。
4488下月初夠鐘，本月26日最後買賣，剩番14個交易日，平水，槓桿率9.6倍。隻輪跟正股會跟到足，正股每變動1%，隻輪則上落1成。
中石油C輪9171：上周五紐約油價回落，中石油（857）如果亦回落，睇位低價買中石油C輪。中石油如果唔跌，則唔做嘢。
9171係啱炒上炒落嘅中石油C輪，明年1月初夠鐘，輪價91仙，溢價9.8%，槓桿率9.4倍（有效5.3倍），引伸波幅37.5%。
中移動C輪3638：吼中移動（941）跌1元以上，喺44.40元以下買C輪3638博反彈。隻輪10月中到期，輪價43.5仙，溢價4.3%，槓桿率10.4倍（有效6.8倍），引伸波幅32.9%。4460接近末日，接近平水，輪價會較為跟貼正股變化。
章盛