早排香港總商會由常務副主席蔣麗莉做領隊，帶領代表團去台北訪問，上個禮拜四先返港，目的係同對方交流吓，等總商會啲會員，喺兩岸三地做起嘢嚟，都可以順暢啲。呢次鴨仔團即時可以做例子，話說有啲團友因為喺內地出生，入台證好難申請，有三個甚至最後去唔到。
蔣麗莉話，台灣官員嚟香港，攞簽證一樣難，有台灣官員同佢講，去內地嘅簽證仲易攞。真係唔明，可能呢啲就係一國兩制，北京可以話事，特區就要逢迎囉。
今次鴨仔團喺台北同唔少高官打過招呼，包括兩岸共同市場基金會董事長蕭萬長、台北市副市長陳裕璋、經濟部國際貿易局副局長吳新華，以及行政院大陸委員會主任委員吳釗燮。可以安排到同咁多人見面，睇嚟領隊蔣麗莉好有面子，難怪佢話呢次收穫甚豐啦。
佢仲做埋馬仔馬時亨嗰份，叫台灣嘅企業多啲嚟香港發展同上市，好好利用吓香港國際金融中心嘅地位，唔單止可以籌集資金，可以吸引多啲國際投資者注意。