喺上海交易所上市嘅股份制銀行民生銀行，早前想嚟香港上市，但拖拖吓，件事已經丟淡晒。
最近民生銀行又成為圈內話題，因為條街傳緊，佢哋搵咗獅子銀行嘅前中國業務總裁王浵世，出任行長，而且監管機構已經批准咗。
內地《財經》雜誌就話王浵世係咪能夠空降，視乎佢可唔可以磨合股東同管理層，說服股東搞制度化、程式化嘅發展模式，唔係淨係靠催谷sales嚟搵銀。
王浵世喺離開滙豐之前，風頭一時無兩，因為佢促成滙豐同上海銀行、平安保險等金融機構嘅合作，而且喺外資短暫撤退中國期間逆市擴張，仲將滙豐中國業務總部從香港搬到上海浦東。
今個星期日民生銀行就會舉行股東會，會上有新一屆嘅董事會、董事長同行長；如無意外，民生銀行現任行長董文標，將接替經叔平出任董事長，王浵世會當選為新任行長。