德國贏葡萄牙3:1得季軍，總算攞番個安慰獎，東道主球迷都算收貨喇。𠵱家德國呢邊最熱門嘅話題，已經唔係談論意大利同法國邊個攞冠軍（執筆之時仍未知冠軍誰屬）；球迷最關心嘅，就係奇連士文會唔會再執教國家隊。
有線直擊隊嚟咗德國接近個半月，對呢支東道主球隊總算有些少感情。個人覺得奇連士文係個難得嘅領軍人才，德國由佢帶領之下，球員變得好有生氣；球迷亦受到呢支活力充沛嘅球隊感染，由賽前一致被睇淡，搖身一變就變成今時今日充滿憧憬嘅世界第3，「奇哥」應記一功。
德國嘅《圖片報》最近做咗一項民意調查，準備呼籲全國8,000萬同胞簽名，希望奇連士文可以繼續執教國家隊。不過，已經同美國籍太太定居喺加州嘅奇連士文，會唔會接受呢項使命繼續執教，關鍵係佢自己想唔想放棄嚮往已久嘅美式生活喇。
史特加謝幕意義大
德國喺史特加擊敗葡萄牙，對奇連士文嚟講感觸最大。因為呢個城巿係佢嘅發祥地，今次返到嚟「家鄉」，親人、朋友、同鄉全部捧場，贏得咁漂亮，難怪佢賽後興奮到忘晒形。比賽結束後，「奇哥」同一班國家隊球員喺球場慶祝咗成半個鐘，而球迷亦唔捨得離場。佢哋齊齊留喺度睇完頒獎又睇煙花，最後仲睇埋球員喺場邊向球迷致謝，感覺有啲似超級巨星開告別演唱會咁，演出者與欣賞者都有種依依不捨嘅感覺。