教統局繼廝殺完小學後，亞瑟王李國章近排決定將戰場殺到上中學，佢仲多次喺立法會度提過殺校政策。八方知道，上星期立法會議員同教統局討論完三三四學制政策，之後由教統局出文件。點知，有立法會議員發現亞瑟王混水摸魚，喺份文件入面加埋中學殺校政策落去，當正議員已經贊成呢樣嘢咁。
做緊教育事務委員會主席嘅楊森上周五發現咗之後好鬼嬲，於是寫咗封信放喺立法會網頁入面，講明唔贊成教統局將殺校政策加入文件，有誤導大眾之嫌。向來鍾意打橫嚟講嘅亞瑟王一於少理，仲寫番封信話中學殺校同三三四學制改革關係好密切，如果唔重整中學班級結構又點行新學制喎！睇嚟委員會今日開會嗰陣，亞瑟王同班議員又會開大片。