官場無大事之際，忽然殺出個銷售稅，唐唐司長今日就會上香港電台等大家可以同高官對吓話，睇怕都離唔開呢個敏感議題。
講銷售稅遠嘅可追溯到十幾廿年前，近嘅就話去年底諮詢，點知拖到𠵱家，到上個禮拜庫務局搞工作坊至重新炒熱。點解拖咁耐？當然同煲呔新官上場有關，而唐唐前途未明，亦無謂急。在特區呢個咁嘅政治環境下，開徵新稅無異政治自殺！君不見阿松司長當年加車稅，雖然只係加多些少，並非全新稅種，已經令到佢自己落台。唐唐如果想更上層樓，呢單嘢真係要小心處理。
至於有啲陰謀論話煲呔叫唐唐出呢單嘢，係想害佢咁話，八方未敢盡信。事關煲呔連任在即，所有麻煩都最好冇，就算唐唐首當其衝，煲呔自己都難置身事外，冇理由玩火啫。