資深股票客戶謝太：Karen！我發覺呢排同你傾偈愈來愈冇癮，次次問你好唔好入市，你都叫我唔好。咁次次我都聽你話，個市就係咁升。上個禮拜仲要叫我買恒生指數認沽證，我仲要輸錢。
年輕貌美經紀Karen：謝太，我感受到你嘅不滿，其實妳已經好好，我其他啲客已經轟到我隻耳仔差唔多聾咁滯。不過講真，謝太，你係同意我以前講過，個市應該會跌嘅理由。例如，因為美國樓市爆煲，好多人被人迫收樓，為咗有瓦遮頭被迫租樓住。不過因為低息咗好多年，呢幾年租樓人數比較少，令到租得嘅樓供應有限，突然間有又咁多人租樓，所以美國租金開始升，又撞正聯儲局好注視嘅「通脹核心指數」有一半比重係用租金計算。通脹數字就會自然好差，聯儲局亦要繼續加息。
謝太：我記得。你仲有講過日本中央銀行一定會繼續抽水，因為日本啲銀行唔需要再有零利率去支持，日本央行又驚零利率會搞到80年代歷史重演，令到過多投資出現。最終引發惡性競爭，人人賺唔到錢還債，最後日本銀行個個都有嚴重呆壞賬問題。
Karen：咪就係咁囉！你話個市點可以唔跌？就算唔係今日跌，或即今個禮拜跌，遲早都會跌。
謝太：不過咁，Karen，你而家係假設日本央行同埋聯儲局都係理性嘅，知道情況有幾嚴重。不過如果我哋假設佢哋唔係理性嘅，佢哋會繼續以前嘅政策，我應該點先？我唔理啊，你今日一定要推薦啲股票畀我買。
Karen：假設如果我錯咗，佢哋唔加息、唔抽水走，咁梗係繼續買原材料股。買個市跌就買認沽證贏錢，如果因頭先講過嘅理由，相信世界會繼續銀紙氾泛濫，原材料價格就一定會升。其實睇下啲金、銀、銅、油價格走勢圖，都好似有呢個迹象出現。所以買個市升，就等於相信繼續銀紙氾濫，亦等於相信原材料價格會升。如果你今日一定要買股票，就買江西銅業、紫金礦業、中海油同中石油啦。
謝太：一邊買恒指認沽證，一邊買原材料股，ok我鍾意。Karen，你點樣諗呢個投資策略出來？
Karen：都係嗰日，我去一間對沖基金面試……