瑞聯上禮拜出報告，新簇簇，睇好國內汽車股。
瑞聯最力薦東風汽車（489）與駿威汽車（203），鍾意東風多過駿威。睇東風目標價4.75元（推介時3.575元），較上周五3.55元高34%；睇駿威目標價3.45元（推介時2.675元），較上周五2.70元高28%。
炒家都知，東風已經吹到上高空，現價較年初彈升82%，較去年12月招股價1.60元更勁飆122%。駿威只係蝸步行動，現價較年初升得唔夠5%，落後東風好多，亦落後過紅籌指數期內21%升幅。
轎車銷情佳
計FollowMe話，炒國內汽車股，應將駿威擺喺頭位。
06年頭5個月，全中國轎車銷量150.3萬輛，同比大增55%。其中1月份大升93%，最出色。5月份放緩至34%，但只係因為05年同期急升咗，基數大咗。睇勢頭，下半年增長仍會靚靚，就算放緩，都只係因為05年下半年基數增大（去年下半年銷量155.5萬輛，較04年同期已升34%）。
廣州豐田5月下旬推出新款Camry，賣到開巷，祖國同胞排隊買。咪淨係當Camry搶晒其他汽車商生意，可視作國內汽車購買力與購買慾大到無倫，汽車唔憂賣。
車市形勢大好，駿威股價反由4月中高位3.75元碌落嚟，插到2.225元先至止跌，與市場景氣脫節。
駿威股價散，除咗因為月前整體股市氣氛唔好，亦因為市場擔心大股東廣州汽車獨立在港上市，驚住引發駿威股東換馬，沽駿威買廣汽。
駿威副主席陸志峰6月6日股東會後表示廣汽無限期擱置上市。當日股價2.725元，現在2.70元。駿威因驚廣汽上市而下跌，理應因廣汽唔上市而上升。
05年度（12月年結），駿威盈利19.06億元，跌8%。06年預測22.10元，每股0.294元，同增16%，預測PE9.2倍。
本港掛牌汽車股中，華晨中國（1114）預測PE47倍，慶鈴（1112）43倍，中航科工（2357）29倍，吉利（175），東風15倍，長城汽車（2333）10倍。駿威拍埋去，靚到爆燈。其他汽車股PE高，有啲有個別條件支撐，例如NAV高。當然，有啲則已炒到過晒火。
美林麥格理睇3.85元
瑞聯上禮拜出報告睇駿威值3.45元，其他大行又點睇？
原來其他大行普遍畀駿威好高分，美林與麥格理齊齊睇3.85元，而睇3元以上者夾埋兩隻手掌數唔晒。中銀國際睇3.70元，佢係中資背景，要信多幾成。駿威亦有淡友，法巴與新鴻證同睇2.50元。好友贏抑或淡友勝，好快有分曉。
以本港掛牌股票市值計，汽車股中，駿威市值最大，達203億元。東風以H股計，值101億元，細過駿威。駿威一直係龍頭汽車股，芬佬買嘢，龍頭股必然係鎮倉對象。
揸駿威最多嘅係鄧普頓，達9.06%，價值18.4億元，並冇其他芬佬揸5%以上。揸東風5%以上嘅芬佬有7個，由6.16%至14.13%；最大嘅摩通，揸東風值14.3億元，都係細過鄧普頓批駿威嘅貨值。
東風急升後，芬佬有換碼到駿威嘅誘因。就算唔換馬，東風吹送，帶動駿威，亦好順理成章。睇住嚟，芬佬隨時埋位大啖大啖食貨，駿威隨時發威。
駿威上周撻火、開車、踩油，好快見第1站3元。見3.45元瑞聯所訂目標價，亦唔使太耐。現價埋位，不必去到美林與麥格理目標價，都已經好和味。
高彰坡