靚女去派對，當然要施展渾身解數搶鏡，中法混血名模AmandaStrang前晚以低胸、大露背裝出席手錶派對，成功揮低密實兼打晒底的特別嘉賓劉心悠，連穿tubetop的扒女李依琳都被比下去。
名牌與明星早已緊密掛勾，前晚Bvlgari舉行手錶派對，請來鄭嘉穎與劉心悠任特別嘉賓。劉心悠一身Gucci花花上衣示人，本來甚搶鏡，但她外加長袖外套，又在花上衣內穿上黑色tubetop打底，可觀性大減，相反其他女嘉賓卻清一色性感示人，包括低胸騷玉背的中法混血名模AmandaStrang、短裙示人的扒女李依琳和酥胸半露的梁家駒千金Vivian等，青春無敵搶盡風頭。
Amanda謂近日與男友為世界盃鬧不快，她說：「我係半個法國人，梗係捧法國隊，男朋友Christian係意大利人，佢就捧意大利國家隊，睇波嗰陣成日嘈交啦，決賽嗰晚都唔知點算？」
拒收禮陪飯局
特別嘉賓劉心悠收到一隻手錶作酬勞，問她可有試過被人送禮約飯局？她以普通話說：「沒有，從來沒有，送禮沒有問題，但有這個念頭就很不自然，出發點太錯了。」
鄭嘉穎也收到手錶，問他可會將錶轉送給視他為契仔的TVB高層樂易玲，他沒好氣說：「喺TVB做嘢，係唔可以送超過500蚊嘅嘢畀人，太貴禮我又送唔起，送膠錶我又送唔出。其實佢當所有藝員都係自己契仔契女㗎啦！唔會正式上契囉，我哋都唔係嗰個年代嘅人。」
採訪：吳天慧
攝影：林德雄
