衞蘭（Janice）同衞詩雖則係孖生姊妹，但平日甚少約埋去街，早排大孖Janice被影到撇甩細妹，自己走咗去郝德傑山睇近千萬豪宅，但上周一晚，又到細孖踢走家姐，同位女性朋友逛街街，行商場狂掃化妝品同靚衫。
一身辣妹打扮
嗰晚七點零鐘，滿面濃妝嘅衞詩以慣常嘅T恤、窄褲加高跟鞋辣妹打扮，同一位年輕女伴出現銅鑼灣時代廣場連卡佛百貨公司嘅LauraMercier化妝品櫃位，當時佢已經手拎一袋，一邊煲電話粥一邊喺櫃位試唇膏同粉底，但試咗足足大半個鐘都冇幫襯，即時令到細心招呼佢嘅女sales成塊面沉晒。
之後衞詩同女伴去商場嘅日本服飾品牌moussy再揀過，咪睇佢人仔細細，摷起嘢上嚟都相當狠，現場見佢喺啲櫃度不停掹衫，揀晒啲tubetop同背心仔對鏡左照右照，跟住仲拎咗至少三套衫入試身室，出嚟時再去另一角揀手袋，搞搞震成粒鐘，好彩呢次有幫襯，最終碌卡買咗個大概一千蚊嘅綠色皮手袋。
但話時話，衞詩都幾貪靚，喺舖頭出嚟之後，無端端戴多兩條頸鏈，啲舉動都幾有趣，最後就坐的士返屋企。
