李嘉欣呢期意氣風發，既有富豪新歡許晉亨，又有叠水舊愛劉鑾雄對佢不離不棄，估唔到佢舊愛前豐裕興業國際主席龐維仁都一樣好本事，之前先成日打電話畀嘉欣望箍煲，但自從對方親口承認許公子男友地位後，龐維仁惟有打退堂鼓，嗱嗱臨翻啅分居老婆黃美儀。
火急歸家
早兩個星期前，龐維仁至同老婆及朋友去中環蘇豪歎西餐，食飽就齊返以前共居嘅花園台愛巢。到上周三凌晨點零鐘，關仁又喺跑馬地嘅LECOQUILLAGE蠔店撞見龐氏夫婦擦蠔，同行仲有三名朋友。
其實嗰間蠔店嘅蠔種類繁多，價錢豐儉由人，由每隻18蚊至68蚊不等，供應地包括英、法、澳、美、日等等。坊間成日話食蠔有壯陽之效，唔怪得之嗰晚有嬌妻在旁嘅龐維仁，都唔怕吞多幾隻肥美靚蠔落肚啦！
大概凌晨一點，龐維仁飽暖思床褥，埋單後即刻一支箭標去街頭攞番部寶馬座駕，尾隨黃美儀就滿面春風咁同班朋友講拜拜，之後至同老公恩恩愛愛齊返名下另一鐵竇曉峰閣度春宵。
Textby關仁
