「別人笑我太瘋癲，我笑別人看不穿。」法國教練杜明尼治世界盃賽前選晒老將，分組賽頭兩場贏唔到，有人甚至話杜明尼治可以執定包袱；不過過吓一關又一關，又俾佢帶到法國入決賽，小弟都唔執輸，再追多次法國。
杜帥「儍人有儍福」
杜明尼治今屆基本上只有兩個決定係好，一個係改打4-5-1陣式，另一個係用列貝利唔用韋托特；法國呢個4-5-1，嚴格嚟講係4-2-3-1，4人防線，加埋一對防中韋拉同馬基列尼，佢兩位專心防守，可以話滴水不漏；進攻就等3位進攻中場施丹、列貝利同馬隆達，同單箭頭亨利去搞；咁啱亨利係阿仙奴打歐冠盃嗰陣，已經開始習慣做單箭頭，難怪可以打得幾醒神，重有3個入波㖭。
唔知杜明尼治「儍人有儍福」，定佢啲占星術有料到；法國由淘汰賽開始，全部對手往績都俾法國剋住，好似西班牙大賽未贏過法國，巴西更加連續兩次喺世界盃輸畀法國。今次法國對手意大利，又係見到法國就怕怕；6年前歐國盃決賽，意大利領先1球，都可以完場前俾法國扳平，法國未開波，心理上已經贏咗一截。
入球大3.3倍抵玩
以飛數睇，意大利平手已經跌到72水，開波前隨時轉讓平/半，捧法國可以畀啲耐性，受讓更加可以放心出擊。除咗讓球盤捧法國，又有個冷嘢博吓，就係入球大；足智彩開到個細只得1.3倍，比法甲波更低；不過講真兩隊又唔係冇攻力，再睇番近5屆決賽，都有兩次開大，比率唔算低。入球大有3.3倍，細細地玩吓，增加睇波樂趣都好。
文：牽牛