今屆世界盃決賽由法國對意大利，喺柏林奧林匹克球場上演，大會喺賽前兩日舉行閉幕禮綵排。以為今次咁筍可以益記者，點知去到先知搵笨；因為綵排只得兩幕，可能要keep住神秘感啦！真係「孤寒」到冇人有。
整個過程10分鐘完成
柏林奧林匹克球場夠晒大，如果圍住佢行一圈，估計要成個鐘先至行得完。點解我咁清楚？事關我曾經試過落錯車，由球場一邊正門行去另一邊傳媒通道，就咁行半個圈都要成30分鐘，你話行一個圈係咪要成個鐘喇。
以前睇世界盃、奧運或者係細規模嘅亞運，閉幕禮都係幾精采，話晒全球億億聲嘅觀眾睇住，東道主又點可以求其呢？不過，今年德國世界盃嘅閉幕禮，大家要有心理準備唔會好精采。因為全個綵排過程仲快過行球場1週，只係10分鐘就已經搞掂，有幾多嘢睇可想而知！或者今次綵排，只係全個環節其中一部份啦！
其實，今次世界盃閉幕禮冇乜好睇，最大原因係國際足協唔想閉幕禮影響球場草地情況；所以就算德國主辦單位希望將閉幕禮搞得好好睇睇，最後都過唔到FIFA呢關。
其實，世界盃難得4年一度，而決賽門票最貴收到600歐元一張（據聞炒價升至10倍），有飛嘅球迷當然希望睇多啲嘢。就算草地唔畀用，都可以用草地外嘅田徑跑道，搞多啲舞蹈表演，搵多啲世界知名歌手獻唱，咁樣閉幕禮先夠精采。
有線06世界盃嘉年華，將於今晚12:00am——1:30am，播出世盃外景隊採訪滙報