「由細到大我最鍾意食童星點心麵，真係最佳零食呀！細細包，帶又方便，食又方便喎。加上又好鬼好味，脆脆哋味道又好。最開心係佢近年出咗好多款唔同味道，我經常都係食炒麵味，同埋闊條麵味。」
側田零食之王
「睇我身形肥嘟嘟，都知我鍾意食零食啦，我可以話係kingofsnacks，加上近期有世界盃，自然一定要有零食喺身，我覺得睇電視時個人唔可以冇嘢做，所以一定要一邊食一邊睇。我其實好多零食都鍾意，好似蝦片、薯片咁，但係我唔會將零食當正餐，都唔會買定啲零食儲備喺屋企，只會肚餓時先去超級市場買，好彩有時歌迷都會送畀我食。」
方力申開聲靈丹
「我鍾意嘅零食，相信好多藝人都會鍾意食，呢樣就係可以潤喉開聲嘅金桑子。未入行之前，我未曾食過，入行之後經公司同事介紹，起初都係上台做騷同錄音之前先食，慢慢就愈食愈密，𠵱家好似靈符咁成日袋喺身，得閒就食一兩粒，甚至連歌迷都知，我平時都唔使自己買，因為fans久唔久就會送畀我，有時多到可以請公司同事食。」
張家輝最愛攪嘢
「我平時一得閒最鍾意就係買一大盒Haagen-Dazs嘅比利時朱古力味雪糕，再用牛奶加Oreo放落攪拌機，攪一大杯出嚟慢慢食囉。我鍾意食除咗係因為好好味之外，仲有就係因為一食就覺得自己好似好年輕咁呀，哈哈！又有人教我用一杯剝皮提子加埋花奶同煉奶雪凍，都好好食㗎。」
採訪、攝影：馬建華、王連連、駱華齡
