中國無線（2369）主打智能手機業務，賣個滿堂紅，成為去年度業績增長功臣，before公布06年度中期業績前，係時候昅昅。上年尾，已經有報道話，聯通（762）以總合約8.8億銀人仔，向中國無線購入15萬部「Coolpad728」型號雙制式手機，中國無線兼且會喺今年底前，陸續付運。呢個數額，係中國無線05年度（12月止）智能手機收入3.25億銀嘅1.6倍！智能手機業有大客仔支持，繼續肥仔水。
中國無線呢期又同德州儀器及大唐電信等大孖沙，合作研究核心手機部件，減少對外採購，務求節省成本。集團收入大增同時，純利率亦因為成本減省措施，應該可以穩定番。保守估計，06年度純利起碼翻半番到7600萬銀，平均PE跌到得番11倍。中國無線升番上家陣14倍PE水位，股價見2.2元，現價（1.84元）潛在升幅20%。
漢傳媒有NAV墊底
漢傳媒（491）今年5月宣布1供5，每股供股價1.4仙，與現價同。漢傳媒呢次大比例供股，遇正港股跌市，可能大家怕怕，並無足額認購，包銷商亦要上身。若然質穿供股價，除非要錢唔要貨，否則，冇人走得甩。
又淨係計入呢次集團供股集資淨額1.44億銀，漢傳媒最新NAV2.5仙，現價相對折讓44%，仲有NAV墊底。漢傳媒一質穿供股價，快車手考慮短打，由1.3仙至1.4仙上落，已經代表7%利潤。
錢雋